Obair dheonach i réimse na cabhrach daonnúla

Ó 2022 ar aghaidh beidh an Cór Dlúthpháirtíochta Eorpach ag oscailt suas don domhan agus cuirfidh sé gníomhaíochtaí oibre deonaí trasteorann ar fáil chun tacú le hoibríochtaí i réimse na cabhrach daonnúla i dtríú tíortha.

Is deis iontach iad na tionscadail sin chun páirt a ghlacadh mar shaoránach gníomhach, dlúthpháirtíocht a léiriú do dhaoine i dtíortha lasmuigh den Aontas Eorpach a bhfuil tubaistí daonnúla le sárú acu nó ar gá dóibh a n-ullmhacht do thubaistí féideartha a mhéadú amach anseo, sin agus scileanna, cultúir agus bealaí beatha nua á bhfoghlaim acu – eispéireas a athróidh an saol go cinnte!

Sa bhreis ar ullmhacht do thubaistí agus fóirithint iarthubaistí, clúdaíonn na tionscadail a mbeidh tú ag glacadh páirte iontu raon leathan saincheisteanna: Seo roinnt samplaí: comhionannas inscne a chur chun cinn, mná agus leanaí a chosaint, dídeanaithe agus daoine easáitithe ina dtír féin a chosaint, imircigh gan doiciméid a chosaint, éifeachtaí an athraithe aeráide a mhaolú, an tslándáil bia a fheabhsú, etc.

Tá rogha agat idir obair dheonach aonair agus obair dheonach i bhfoirne, ar feadh tréimhse ghearr nó tréimhse níos faide.

Obair dheonach aonair

• maireann sé idir 2 mhí agus suas le 12 mhí
• obair lánaimseartha atá ann (idir 30 agus 38 n-uaire an chloig sa tseachtain) 
• cuireann sé ar do chumas duit páirt a ghlacadh sna tascanna laethúla a bhfuil gá leo chun tacú leis na gníomhaíochtaí a dhéanann an eagraíocht óstach, ar eagraíochta í atá gníomhach i réimse na cabhrach daonnúla
• obair ‘thrasteorann’ atá ann – i dtír eile seachas an tír ina bhfuil cónaí ort – agus tarlaíonn sé i dtríú tír ina bhfuil gníomhaíochtaí agus oibríochtaí i réimse na cabhrach daonnúla ar siúl

Obair dheonach foirne 

Mura féidir leat glacadh le tréimhse fada, ach má tú fós ag iarraidh cabhrú, caith súil ar obair dheonach foirne:

• maireann sé idir 2 sheachtain agus 2 mhí
• obair lánaimseartha atá ann (idir 30 agus 38 n-uaire an chloig sa tseachtain)
• bíonn tú ag obair le daoine ó 2 thír éagsúla ar a laghad
• bíonn idir 5 agus 40 oibrí deonacha páirteach agus is iad na heagraíochtaí tacaíochta agus na hósteagraíochtaí a roghnaíonn iad 
• tarlaíonn sé i dtríú tír ina bhfuil gníomhaíochtaí agus oibríochtaí i réimse na cabhrach daonnúla ar siúl

Eagraíochtaí tacaíochta agus óstacha

Má roghnaítear thú le dul go tír eile chun obair dheonach a dhéanamh i réimse na cabhrach daonnúla, beidh 3 eagraíocht ar a laghad páirteach ann:

• Dhá eagraíocht tacaíochta ar a laghad – ó Bhallstáit éagsúla an Aontais nó ó thríú tíortha atá comhlachaithe leis an gclár (an Íoslainn, Lichtinstéin, an Tuirc agus an Mhacadóin Thuaidh). Cuideoidh na heagraíochtaí sin leat ullmhú le haghaidh do thaithí i dtír eile. 
• Aon eagraíocht óstach amháin ar a laghad – atá lonnaithe i dtríú tír nach bhfuil comhlachaithe leis an gclár i gcás nach bhfuil aon choinbhleachtaí idirnáisiúnta nó neamh-idirnáisiúnta leanúnacha ann agus ina mbíonn gníomhaíochtaí cabhrach daonnúla ar siúl. Beidh an eagraíocht sin in éineacht leat agus tú i mbun obair dheonach i dtír éigin eile. 

Cé atá in ann obair dheonach a dhéanamh?

Tá gníomhaíochtaí oibre deonaí an Chóir Dlúthpháirtíochta Eorpaigh oscailte do dhaoine idir 18-30 bliain d’aois (35 bliana d’aois i gcás obair dheonach i réimse na cabhrach daonnúla) a bhfuil cónaí orthu go dleathach i mBallstát den Aontas nó i dtríú tír atá bainteach leis an gClár (an Íoslainn, Lichtinstéin, an Tuirc agus an Mhacadóin Thuaidh) agus a chláraigh ar Thairseach an Chóir Dlúthpháirtíochta Eorpaigh.

Cad atá clúdaithe?

• Beidh tú clúdaithe le hárachas saor in aisce.
• Beidh rochtain agat ar raon seirbhísí tacaíochta ar nós tacaíocht teanga agus oiliúint
• Clúdófar do bhunchostais (do thaisteal chuig an tionscadal agus ar ais uaidh, do chuid lóistíochta agus do bhia)
• Gheobhaidh tú liúntas beag freisin le haghaidh caiteachais phearsanta 
• Má tá riachtanais shonracha agat (mar shampla, míchumas), d’fhéadfaí na costais sin a chlúdach freisin

Cén dóigh le clárú?

Bíonn an deis ag daoine óga idir 18 agus 35 bliana d’aois a spéis a léiriú in obair dheonach i réimse na cabhrach daonnúla nuair a chláraíonn siad ar thairseach an Chóir Dlúthpháirtíochta Eorpaigh.

Chun spéis a léiriú in obair dheonach i réimse na cabhrach daonnúla, ba cheart d’iarrthóirí na céimeanna seo a leanas a leanúint:
téigh chuig ‘Mo phróifíl’
- téigh chuig ‘Tionscadail oibre deonaí i réimse na Cabhrach Daonnúla’
- roghnaigh ‘Is mian liom a bheith curtha san áireamh le haghaidh tionscadail oibre deonaí i réimse na Cabhrach Daonnúla’
- líon isteach gach eolas ábhartha eile
- sábháil an t-eolas

Chun iarratas a dhéanamh ar fholúntais faoin gCór Saorálach Eorpach um Chabhair Dhaonnúil, ní mór do dhaoine óga oiliúint éigeantach a chur i gcrích. Is éard atá ann modúil ar líne ar ardán Acadamh an Aontais Eorpaigh agus, dóibh siúd a n-éiríonn an triail leo ag deireadh na hoiliúna ar líne, oiliúint 5 lá duine le duine i ngrúpaí ina bhfuil thart ar 25 iarrthóir.

A luaithe a chláraíonn iarrthóirí ar an tairseach agus a chuireann siad in iúl gur spéis leo an obair sin, is féidir rochtain a fháil ar na cúrsaí oiliúna ar líne ar Acadamh an Aontais Eorpaigh tríd an táb ‘Oiliúint ar líne’ ina gcuntas don Chór Dlúthpháirtíochta Eorpach. Ba cheart d’iarrthóirí ‘Oiliúint cabhrach daonnúla’ a roghnú. Ar ardán Acadamh an Aontais Eorpaigh, tabharfar cuireadh dóibh ar dtús féinmheasúnú a dhéanamh. Má chinneann siad leanúint leis an bpróiseas, cuirfidh siad tús leis an oiliúint éigeantach ar líne le haghaidh Obair Dheonach i réimse na Cabhrach Daonnúla. Beidh tástáil ar líne le déanamh ag deireadh na hoiliúna. Tar éis dóibh an tástáil ar líne a chur i gcrích go rathúil agus a léiriú go bhfuil siad ar fáil don oiliúint duine le duine tríd an ‘réiteach sceidealaithe’, rachaidh an soláthraí seirbhíse atá freagrach as an oiliúint a sholáthar i dteagmháil leis na hiarrthóirí laistigh de 1 go 2 mhí chun iad a chur ar an eolas faoina sliotáin atá ar fáil don oiliúint duine le duine.

Eagraítear an oiliúint duine le duine i dtrí shliotán in aghaidh na bliana: Feabhra – Márta, Bealtaine – Meitheamh agus Meán Fómhair – Deireadh Fómhair. Foilsítear féilire na seisiún sealadach ar Acadamh an Aontais Eorpaigh faoin mír ‘Oiliúint ar líne d’iarrthóirí ar an gCór Saorálach Eorpach um Chabhair Dhaonnúil’. I ngeall ar an spéis mhór a léirítear san oiliúint duine le duine i réimse na cabhrach daonnúla, ní mór an réiteach sceidealaithe chun iarratas a dhéanamh ar oiliúint duine le duine a dhúnadh ó am go ham. Chun eolas a fháil faoi na tréimhsí ama a mbíonn an clárú ar oscailt, féach an t-eolas faoi Acadamh an Aontais Eorpaigh.

/!\ Ós rud é gurb airde i bhfad líon na n-iarrthóirí a bhfuil spéis acu ná líon na ndeiseanna oibre deonaí i réimse na cabhrach daonnúla atá á gcur ar fáil ag na tionscadail, níl aon ráthaíocht ann go roghnóidh ceann de na tionscadail oibre deonaí i réimse na cabhrach daonnúla thú tar éis duit an oiliúint a chur i gcrích.

Má tá aon cheist agat faoin oiliúint, déan teagmháil le foireann an Chóir Dlúthpháirtíochta Eorpaigh ag [email protected].